(ရှင်လုကာခရစ်ဝင် ၁း၃၇-၃၈)
ဘုရားသခင် တတ်နိုင်တော်မမူသော အမှုမရှိဟု ပြောဆိုလျှင်၊- မာရိက၊ အကျွန်ုပ်သည်
ထာဝရဘုရား၏ ကျွန်မ ဖြစ်ပါ၏။။ ကိုယ်တော်၏ စကားအတိုင်း အကျွန်ုပ်၌
ဖြစ်ပါစေသော ဟု ၀န်ခံပြီးမှ၊ ကောင်းကင်တမန်သည် မာရိထံမှ သွားလေ၏။
မာရိ၏ ၀န်ခံစကားမှာ အလွန်ပင် အတုယူဖွယ်ရာဖြစ်ပါသည်။ ခရစ္စမက် အချိန်ရောက်တိုင်း မာရိ၏ဘ၀အသက်တာကို ပိုမို ဆင်ခြင်မိသည်။ကျမ်းစာပညာရှိအများစု သဘောတူကြသည်မှာ မာရိသည် ဆယ်ကျော်သက်အရွယ် အမျိုးသမီးလေးတစ်ဦးမျှသာ ဖြစ်သည်။ ခန့်မှန်းခြေဖြင့် မြင်ယောင်ကြည့်လိုလျှင် (၁၆)နှစ်အရွယ် အမျိုးသမီးလေးတစ်ဦးကို မြင်ယောင်ကြည့်နိုင်သည်။
သူမတွင် ခင်ပွန်းသည်မရှိပါ။ သို့သော် ကောင်းကင်တမန် ဂါဗြေလက သူမ၌ ပဋိသန္ဓေတည်မည်ဟူသော ဘုရားသခင်၏ စကားကို ဆင့်ဆိုခဲ့သည်။ ထိုအခါ “ကိုယ်တော်၏စကားအတိုင်း အကျွန်ုပ်၌ ဖြစ်ပါစေ” ဟု ၀န်ခံခဲ့လေသည်။ အသေအခြာ သူ့နေရာမှ နေကြည့်ကာ ဆင်ခြင်လျှင် ထိုစကားပြောဖို့ဆိုသည်မှာ လွယ်ကူသော အလုပ်မဟုတ်ပါ။
သူမသည် လူငယ်လေးတစ်ဦးမျှသာဖြစ်သည်။ သူမ၏ မိဘများအတူရှိနေခဲ့လျှင် မိဘများကိုယ်တိုင်၏ ငြိုငြင်မှုကို အကြီးအကျယ်ခံရမည်။ (အချို့သော အရှေ့အလယ်ပိုင်းဒေသများတွင် ယနေ့တိုင် ထိုသို့အိမ်ထောင်မရှိဘဲ ကိုယ်ဝန်ရှိလာသော သမီးအား အသေသတ်ခွင့် ဖခင်များတွင် ရှိသည် ဟု ဖတ်ဖူးပါသည်။) မာရိ ထိုသို့ဖြစ်သည်ကို ဘာသာရေးခေါင်းဆောင်များသိလျှင် ကျောက်ခဲနှင့်ပေါက်ကာ အသတ်ခံရကိန်းလည်း ရှိသည်။ သင်သာ သူ့နေရာတွင် ရှိခဲ့လျှင် ထိုအဖြစ်အပျက်အား ကောင်းကြီးမင်္ဂလာဟု မြင်ပါမည်လား။ သို့မဟုတ် ဘုရားသခင်အား မည်သို့တုံ့ပြန်မည်နည်း။
မာရိ၏ တုံ့ပြန်မှုမှာ “ကိုယ်တော်စကားအတိုင်း အကျွန်ုပ်၌ ဖြစ်ပါစေ” ဟူ၍ဖြစ်သည်။ ယနေ့ ခရစ်များအကြားတွင် “အလိုတော်အတိုင်းပဲပေါ့” ဆိုသော စကားမှာ ကြားရဖန်များသော စကားဖြစ်သည်။ အဓိပ္ပာယ်မှာ အခြားသောဘာသာဝင်များ၏ “ကံစီမံရာပေါ့” ဆိုသော စကားနှင့် မခြားပါ။ ကျမ်းစာသင်တန်းများတွင် ဘုရားသခင်၏အလိုတော်အား သိနိုင်ပါသလား ဟု မေးသောအခါများတွင် မသိနိုင်ပါ ဟု အများစုဖြေသည်ကို ကြုံဖူးပါသည်။ ထိုသို့မဟုတ်ပါ။ သိနိုင်သောအလိုတော်ရှိပါသည်။ မရှင်းလင်းသောအလိုတော်ရှိပါသည်။
မာရိ၏ စကားမှာ “အလိုတော်အတိုင်းပဲပေါ့” ဟူ၍ မဟုတ်ပါ။ “ကိုယ်တော်၏စကားအတိုင်း” ဟူ၍ဖြစ်ပါသည်။
အဓိပ္ပာယ်မှာ မာရိသည် ကိုယ်တော်၏ စကားကိုကြားသည်။ ထိုစကားအားဖြင့်ရလာမည့် အကျိုးကျေးဇူးကို ရှင်းလင်းစွာ မြင်နိုင်ခြင်းတော့ မရှိသေးပါ။ တနည်းအားဖြင့် အလိုတော်နှစ်ဆင့်ဟု ပြောလို့ရပါသည်။
ပထမတဆင့်မှာ ဘုရားသခင်၏စကားတော်ကို ကြားခြင်းဖြင့် သိလာသော အလိုတော်ဖြစ်ပါသည်။ ၄င်းမှာ သိနိုင်သော အလိုတော်ဖြစ်ပါသည်။ ခရစ်ယာန်များအနေဖြင့် နှုတ်ကပတ်တော်ကို ဖတ်ရှုခြင်း၊ တရားဟောချက်များကို ကြားနာခြင်း၊ နေ့စဉ်မြင်တွေ့ ကြားသိနေရသော ပတ်ဝန်းကျင်…စသည်တို့မှ ဘုရားသခင်၏ စကားကိုကြားကာ သိနိုင်သော အလိုတော် အမြောက်အများရှိပါသည်။
အပ်ကြောင်းထပ်ကာ သိထားပြီးသော အလိုတော်ပြောရမည်ဆိုလျှင်… သင်၏ဘုရားသခင် ထာဝရဘုရားအား စိတ်နှလုံးအကြွင်းမဲ့ ချစ်လော့၊ ကိုယ်နှင့်စပ်ဆိုင်သောသူအား ကိုယ်နှင့်အမျှချစ်လော့ ဟူသော အလိုတော်ပင်ဖြစ်သည်။ ကြားဖူး သိဖူးသော်လည်း စမ်းသပ်ရကောင်းမှန်း မသိသူအမြောက်အများ ရှိပါသည်။ ရန်သူကိုချစ်ပါ ဆိုသော ဘုရားသခင်၏အလိုတော်ကိုလည်း ကြားဖူးမည် ဖြစ်သည်။
ဒုတိယအဆင့်မှာ စကားတော်ကို လိုက်လျှောက်ခြင်းဖြင့် ကြုံတွေ့ရကိန်းရှိသော ဒုက္ခများအား ရင်ဆိုင်မည်ဆိုသော အလိုတော်ကို ၀န်ခံခြင်းဖြစ်သည်။ ၄င်းအား ဘာကြောင့်မှန်းမသိသော… မရှင်းလင်းသော အလိုတော်ဟု ခေါ်ဆို၍ ရနိုင်ပါသည်။ အချို့သော အလိုတော်များကို လိုက်နာခြင်းဖြင့် လက်ငင်းအကျိုးအား မတွေ့ကြရသောအခါ မလိုက်နာလိုကြပါ။ ဥပမာ မုသားမပြောပါနှင့် ဆိုသောအလိုတော်သည် လိုက်နာလျှင် လက်ငင် ဆိုးကျိုးများစွာ ရှိနိုင်သောကြောင့် အများစု က မုသာကိုသာ ရွေးချယ်လိုက်ပါသည်။
မိတ်ဆွေ သင် “ဘုရားသခင်၏စကားတော်အတိုင်း အကျွန်ုပ်၌ဖြစ်ပါစေ” ဟု ဆိုနိုင်ဖို့ရန် အသင့်ရှိပြီလား။ အာမင်
No comments:
Post a Comment